السلام عليكم ورحمة الله وبركاته
الصلاه الصلاه ما احلى الصلاه والله انها راحة المسلم دنيا وآخره.....
أنا كنت أصلي والحمد لله أهلي عودوني على الصلاه من يوم وانا في الإبتدائي وقبل لا ابلغ حتى جزاهم الله خير.....
كنت ما افوت فرض لكن كيف كانت صلاتي هنا المشكله....
من سالفه في سالفه وانا اصلي والا طول الوقت اخطط عن ويش بسوي الحين ومتى بنظف البيت ومتى بعمل كذا مايطلع النظام والترتيب الا اذا قلت الله وأكبر......
ياربي تعبت ما اقدر انتبه لصلاتي دقيقه اركز في اللي اقوله ثواني وارجع اسرح لبعييييييييييييييييييييييييييي ييد وفي النهايه تخلص الصلاه وانا ما افتكر وش قلت في صلاتي الا الشيء القليل.....
يارب سامحني عن كل صلاه ما أديتها بشكل تام ولا خشعت فيها.......
وقررت اني ما افضل على هذي الحال وقمت بعدة خطوات ساعدتني الوصول للخشوع:
أولا:ما أخلي شغلي في أوقات الصلاه يعني أخلص شغلي دايما بدري وقبل لا يحل وقت الصلاة.....
مثلا:بقي على أذان الظهر ربع ساعه أو نصف ساعه ما أروح أسوي شويه من الغدا وأقول الباقي بعد الصلاه هذا غلط وأكبر غلط تدرين ليش لأنك بمجرد تقولين الله أكبر راح يقول الشيطان الله يستر لاتنحرق الطبخه الفلانيه وشويه يقول شوفي الساعه كم باقي لها والا صدق ايش بسوي سلطه يووووووه ماعندي ليمون ولا طماطم ووووووو......الخ والصلاه راحت كلها طبخ في طبخ غير التوتر لاتنحرق الطبخه.....
الحل:لاتقومين تسوين الغدا الا بعد ماتصلين الظهر وتخلصين وبعدين من قبل الصلاه امسكي ورقه وقلم واكتبي ابسوي كذا وكذا وكذا وخلاص علشان تكونين جاهزه للصلاه وماعندك تفكير في شي وهكذا باقي الأشغال اعمليها قبل الصلاه بوقت وخلصيها قبل ما يأذن أو خليها مره وحده بعد الصلاه لاتشتغلين في النص وتقولين شويه قبل الصلاه وشويه بعدها ماراح يخليك الشيطان في حالك......
ثانيا:إذا عندك أطفال وقت الصلاه لازم يكون شبعان ونظيف علشان مايبكي وانتي في نص الصلاه وانتي سابق لاحق علشان تخلصين وتسكتينه واذا عندك احد في البيت ممكن يمسكه لايقصر ياخذه لغرفه بعيده عنك حتى تخلصين.....وحتى لاتشيلين همه لايبكي لايطيح لايتعور خلاص تصلين وانتي متطمنه انه فيه من يرعاه لحد ماتخلصين......
ثالثا:لاتصلين في غرفه كلها تحف وزينات واشياء من هنا واشياء من هنا تدرين ليش لأنك ماراح يجيك التأمل والسرحان في هذي الأشياء اللي قدامك الا وقت الصلاه الشيطان يجري من ابن آدم مجرى الدم وتلاحظين نفسك في غير وقت الصلاه ماتتطالعين فيها ولا تجيبين خبرها.....
رابعا:الغرفه ان كان الجو برد فلازم تكون دافيه لأنها لو بارده بتقعدين طول الوقت تفركين يدك في بعض وتتكلمين في نفسك يوه ياذا البرد وش ذا ذبحنا وتنقرين هذي الصلاه نقر علشان تخلصين بسرعه وتدخلين تحت اللحاف......أما إذا كان الجو صيف لازم تكون الغرفه بارده والا طول الوقت تتهفهفين وتمسحين العرق بالمنديل كل شويه وكالعاده تكلمين نفسك وش ذا الحر متى اخلص واشغل المكيف والصلاه يخلف الله سواليف في فصول السنه.....
خامسا:الجوال وما أدراك ما الجوال في ناس والله تقطع الصلاه إذا رن الجوال حرام عليكم......الجوال عالصامت حتى تخلصين الصلاه ليش اذا بغينا ننام حطينا الجوال عالصامت علشان ما احد يزعجنا والصلاه عادي لو بس ترن نغمة الرساله تعالي شوفي التفكير تمسكين اللي في الدليل كلهم يمكن هذا ويمكن هذا وووووو.......والصلاه وااااااااااااااااااااااه ولا تدرين وش قلتي يارب رحمتك......
سادسا:علمي عيالك وزوجك لاتكلموني وانا اصلي مثلا أحيانا يجي واحد يسألك وانتي تصلين وطبعا اجابة السؤال بتكون نعم او لا مابيسألونك سؤال فيه كلام لأنهم يعرفون ماراح تجاوبينهم فيجي الولد ماما اروح العب مع الجيران وهي تهزهز بذا الراس اي والا لا والزوج دخل انا رايح يا الله مع السلامه وهي تهز بذا الراس طيب طيب والا وين جوالي وهي تأشر بيدها على الكومدينه لا تقولون ماتحصل لا تحصل وانا شفت هذا الشي بعيني.....وقت الصلاه عودي اللي حولك لا احد يكلمني والا يسألني انا في لقاء مع الله مايصلح اتكلم.......
سابعا:لاتصلين في غرفه فيها حريم قاعدات وما ادراك ما النسوان تسولف وتسولف وتسولف وانتي كل صلاتك مع السالفه ودقه وحده وتردين عليها والدليل الوحده بس تخلص الصلاه وتلتفت لا يافلانه مو كذا والا ايوه كذا الطريقه صح ماشاء الله اثاريها تصلي وتتسمع وتبغى تخلص بس علشان تكمل سالفة المره اللي قاعده هناك.....الصلاه في غرفه خاليه من مخاليق الله والتلفزيون ايضا لأن عينك بتصير هناك وتتابعين كمان وتسمعين كل شي والصلاه يفتح الله ......
ثامنا:شرشف الصلاه البسيه مزبوط قبل تبدأين الصلاه لاتجين مسرعه وتلبسينه اي كلام وفي الصلاه هاتك ياتعديل تسحبين من هنا وتسترين من هنا وطول الصلاه وانتي مشغوله بهالشرشف تعديل وماراح تدرين وش قلتي في صلاتك
أخيرا:وانتي تصلين حاولي قدر المستطاع تقرأين بشويش تركزين في اللي تقولينه ولو سرحتي شويه ارجعي شدي على نفسك وركزي وشويه شويه راح تتعودين وتصيرين والله بمجرد ماتقولين الله وأكبر تنسين الدنيا ومافيها وكمان في شي أخير بنبه عليه اذا جيتي تركعين اركعي على مهلك واسجدي على مهلك هذا يساعد على الخشوع بعض الناس اذا جت تسجد تطيح طيحه تسمعين صوت ركبها في الأرض وكأنها طاحت من السما بسم الله الرحمن الرحيم وش فيك عسى ماشر بشويش حبه حبه الدنيا مابتطير.....
انا عملت بكل هذي الخطوات زيادة على الدعاء بإن الله يساعدني على الخشوع ويرزقني الطمأنينه وصرت والله استمتع وانا اصلي واذا خلصت انتظر الصلاه الجايه بشوق ولله الحمد.......
عسى الله ينفعكم بما كتبت واذا فيه اي خطأ مني فهو من الشيطان فنبهوني....
جزاكم الله خير لقرآءة موضوعي ونفعكم به ان شاء الله......
الجمعة مايو 21, 2010 12:54 pm
